«Нефтчи»-«Aluminij» баҳси якунига етгач жамоамиз бош мураббийи Исломбек Исмоилов мухбиримизга қисқача интервью берди:
— Бугунги ўйинга тўхталсак, ўйлашимча яхши ўйин бўлди. Рақибимиз Словениянинг яхши жамоаларидан бири эди. Умуман олганда, амалга ошириш керак бўлган режаларимизни босқичма-босқич йўлга қўймоқдамиз. Бу амалга ошираётган режа ва ғояларимиз битта китоб эмаски, футболчилар уни бир кунда ўқиб тушуниб қолишса. Бунга вақт керак бўлади. Кўп нарсаларни ўзгартиришга ҳаракат қиляпмиз. Лекин футболчиларга раҳмат айтаман, улар бугун максимал даражада ҳаракат қилишди ва ўйин олдидан қўйилган вазифаларни бажаришга уринишди. Иккинчи бўлимда кўпроқ ёшларга имконият бердик. Бу ҳам керакли амалиёт. Чунки жамоадаги ёшларнинг ўзига бўлган ишончини аста секинлик билан ошириб боришимиз зарур. Шунинг учун ҳар бир ўйинда ёшларга имконият беришга ҳаракат қилиб бораяпмиз. Бугунги беллашувда ҳам олтита 17-18 ёшли футболчиларимиз ҳаракатланишди. Бу албатта жамоанинг келажаги учун фойдали ҳолат. Легионерларга тўхталсак, Ратинъо жароҳатидан қутилиб, тикланиш жараёнини ўтамоқда. Нимели эса виза муаммоси туфайли қароргоҳимизга бугун келиб қўшилди. Албатта бу футболчилар ҳам тез кунларда жамоага тўлиқ киришиб кетишади.
— Бугунги ўйиндан қаноатландингизми?
— Ўйиндан тўлиқ қониққанимиз йўқ, чунки ҳали қиладиган ишларимиз жуда кўп. Ўйин сифатини янада яхшилашимиз керак. Ҳозирда таркибимиздаги ўйинчилар керак бўлса уч-тўрт баравар яхшироқ ўйин намойиш эта олишади. Шу жоиз, футболчиларимизга ғояларимизни сингдириш учун бизга ҳозир фақат вақт керак. Булар ҳам мураббийлар штабини ва биз талаб қилаётган ўйин услубимизни тушиниб етишларига ҳам вақт керак. Сабаби, жамоа бунгача уч йил давомида битта схема ва тактикада ҳаракатланган. Шунинг учун ундан жамоани олиб чиқиб кетиш учун анча вақт ва катта меҳнат талаб қилинади. Биз тўхтаб қолмаймиз ва ҳаракат қилмоқдамиз. Худо хоҳласа янги мавсумга жамоамиз ўзининг энг юқори ва оптимал формасида етиб келади.