Sesh. May 21st, 2024

"NEFTCHI"

Professional futbol klubi

НОХАҚЛИКМИ ЁКИ ТАСОДИФ? 

 

Хабарингиз бор,  жамоамиз бугун Ўзбекистон Суперлигасининг қолдирилган 17-тур баҳсида Олмалиқда ОКМК меҳмони бўлди. Учрашув ҳақида маълумотга эгасиз,жамоамиз 89 дақиқада Муҳсин Убайдуллаевнинг голи эвазига муҳим очкони қўлга киритди.Беллашувда энг эсда қоларли воқеалар кўп бўлди ва ушбу воқеликка бош ҳакам ва ВАР ҳакамларининг қарорлари туртки бўлди, деб айтсак асло муболаға бўлмайди. Чунки, учрашувнинг биринчи бўлимидаги белгиланган пенальти жуда ҳам баҳсли ҳолат ҳисобланади. Тажрибали Лутфулла Тўраев Санжар Турсуновга нисбатан қоида бузилган деб топилиши бу инсон омиллари нуқтаи назарига тўғри келадими?  Яъни, чап оёғини кўтарган Тўраев ўнг оёқ учини ерга қўйганда Турсунов оёғи унинг тагига келиб қолган. Тўраев унинг оёғини босмаслиги учун ҳавода камида 3 секунд туриши зарур эди. Лекин ҳакам ВАРга мурожаат қилди ёки ВАРдагилар Танташевга мурожаат қилишди. Маълумот ўрнида, бугунги ўйинда ВАР ҳаками ЛУТФУЛЛИН хисобланади  Лутфуллин охирги икки турдан бери мухлисларимизга анча таниш бўлиб улгурган. Сабаби, ушбу ҳакам жамоамиз иштирокидаги сўнгги «Сўғдиёна» билан.бўлиб ўтган баҳсда ҳам икки голимизни ҳисобга олмаган эди.Лутфуллиннинг  қарорларидан норози бўлган мухлисларимиз майдонга чиқиб келганлигини қайд этган тартиб интизом қўмитаси жамоамизга «Яхшигина» жарима ҳам қўллагани ҳеч кимга сир эмас. Хуллас, ушбу ҳакам бугунги учрашувда ҳам ВАРда фаолият олиб бориб, жамоамиз дарвозаси томон пенальти белгиланишида жуда катта роль ўйнади.Бундан эса унумли фойдаланиб, гол урган ОКМК жамоаси ҳисобда олдинга чиқиб олди. Шундан сўнг жамоамиз томонидан 44 дақиқада киритилган жавоб тўпини Танташев  инобатга олди, бироқ ВАР ҳакамларининг қарорлари билан гол яна бекор  қилинди.

Иккинчи бўлим аввалида яна катта саҳнага бош ҳакам билан ВАР ҳакамлари чиқишди. Майдон марказида Мирзоҳид Ғофуров билан тўп учун курашда ўта қўпол зарба ишлатган  Ислом Тўхтахўжаевга бош ҳакам Танташев иккиланиб ўтирмай футболчига қизил карточка кўрсатди. Бироооқққ,  ВАР яна ишга тушди. Танташев дарҳол Лутфуллинга лаббай, деб жавоб берди. ВАРни кўриб чиқишда ўзида жасорат топа олган Танташев ушбу вазиятда қизил карточка йўқлиги ва бу вазият фақат огоҳлантириш билан кифоя қилиш мумкинлигини жамоатчиликка кўрсатиб берди. Ваҳоланки, Мирзохид Ғофуров ушбу вазиятда жароҳат олди ва кўп ўтмай эса ушбу жароҳат туфайли майдонни эрта тарк этишига тўғри келди.

Бундан ташқари учрашувнинг 85 дақиқадасида жамоамиз бурчак тўпи тепиш хуқуқига эга бўлди. Тўпни Мухитдинов рақиб жарима майдончаси ичига чиройли етказиб берди. Тўп учун курашда эса Анвар Ғофуровга нисбатан рақиб футболчиси қўпол ўйнади ва тўпни майдондан узоқлаштириб тепиб юборди.  Ушбу вазиятда ВАР ҳакамлари Танташевга мазкур ҳолатни қайта кўриб чиқиш учун огоҳлантирмади ҳам…

Шундан сўнг жамоамиз гол уришга эришди. Яхшиямки, ушбу вазиятда қоида бузилиши мумкин бўлган ҳолат йўқ эди, бўлмаса билмадик…

Шунақа гаплар,  дўстлар!

Олдинда жамоамизни яна бир қийин ўйин кутиб турибди. Ушбу учрашув 31август куни  «Истиқлол» стадионида бўлиб ўтади. Қийин учрашув дейилишига сабаб иккита. Биринчиси, ушбу водий дербиси учрашувига наманганлик ҳакам тайинлангани бўлмоқда. Хабарингиз бор, жамоамиз Ўзбекистон Суперлигаси 17-туридан сўнг айнан Наманганнинг «Навбаҳор» жамоаси билан очколари сони бўйича тенг. Ушбу учрашувга нега айнан наманганлик ҳакам тайинлангани жуда ҳам таажжубли. Иккинчи омил, «Андижон» жамоаси ҳам ҳозирда анча кучли ўйин кўрсатмоқда ва жамоаларнинг турнир жадвалидаги ўрни муҳим хисобланмайди. Дерби ўз ўзидан дербидир.

Хуллас, мухлисларимизга сабр тилаган ҳолда жамоамиз иштирокидаги ўйинларда ёлғизлатиб қўймасликларини сўраб қоламиз.

 

🟢»Нефтчи» ПФК матбуот хизмати

Улашинг: