Шерзод Ҳакимов: “Нефтчи”га ёрдам бериш учун жонажон жамоамга қайтдим”
09.08.2018

ПФЛ ва “Championat.asia” сайти ҳамкорлигида ўтказилган энг яхшиларни аниқлаш сўровномасига кўра июль ойининг “энг чиройли голи” муаллифига айланган “Нефтчи” аъзоси Шерзод Ҳакимовнинг фикрлари билан қизиқдик.

– “Табиийки, “Нефтчи”дан кетганимдан сўнг футболчилик фаолиятимни яна давом эттирдим. Қайсидир жамоадан кетсангиз бу хаёт тўхтаб қолганини англатмайди. Про-лига клубида ҳам ўз устимда ишлашда давом этдим. Ҳаммасига футболга бўлган меҳрим ва муносабатим сабаб бўлди, дейишим мумкин. “Нефтчи”га қайтишим борасида гапирадиган бўлсам, ушбу жамоа мен учун қандай қадрли эканлигини барча мухлислар яхши билишади. Бошқа клубда тўп суришимга қарамай, “Нефтчи”нинг ўйинларини мунтазам кузатиб бордим, ҳеч қачон уларга бефарқ бўлмадим. Жорий мавсумда жамоамиз мухлислар кутган натижаларини қайд эта олмаяпти. Шу сабабдан яна ўз голларим билан “Нефтчи”га ёрдам бериш мақсадида жонажон жамоамга қайтдим”.

– “Киритгам голимни кенг жамоатчилик эътироф этганидан хурсанд бўлдим. Ўша вазиятда Мурод Бобожонов мени ажойиб узатма билан таъминлагани боис яхши вазиятга эга бўлдим. Шу боисдан ҳам голда жамоадошим Мурод Бобожоновнинг ҳиссаси катта бўлди. Мен хар бир ўйинда гол уриб, “Нефтчи”нинг ғалабаси учун боримни беришни истайман”.

photo_2018-08-09_13-45-25

– “Тўғрисини айтадиган бўлсам, ўша голни жамоам ғалабасига алмашган бўлардим. Чунки ҳар бир футболчи аслида жамоа манфаатини кўзлаб ўйнайди ва табиийки “Нефтчи”нинг ғалабаси ҳар қандай голимдан устунрок туради. Жамоавий ўйинда голни ким ёки қандай киритиши муҳим эмас. Асосийси – ғалаба. Афсуски, “Бунёдкор”га қарши ўйинда яхши ўйин намойиш этишимизга қарамай, якунда мағлуб бўлгандик. Биз доим олға борамиз ва бўлажак баҳсларнинг барчасида фақат ғалабани кўзлаган ҳолда майдонга чиқамиз”, – деди июль ойининг энг чиройли голи муаллифи Шерзод Ҳакимов.

© "Fcneftchi.uz". Барча ҳуқуқлар химоя қилинган. Хар қандай маълумотлардан фойдаланилганда, сайтга йўлланма берилиши шарт. Ишлаб чиқилган “Saflor”.